Urteko azken azokak Irungo eta Hondarribiko parte-hartzaileak bildu zituen Zabaltza plazan. Gainera, 78 poltsa berrerabilgarri banatu ziren, kontsumo jasangarriagoa sustatzeko.

Joan den larunbatean, urriaren 17an, denboraldiko azken Merka2dasoa azoka egin zen Irungo Zabaltza plazan. Horrela, Txingudiko Zerbitzuek bultzatutako bigarren eskuko merkatuak amaiera eman dio beste denboraldi bati, objektuen berrerabilera eta herritarren artean kontsumo arduratsuagoa sustatzea helburu izan duena.

Goiz osoan euria egin zuen arren, eta horrek bisitarien joan-etorria baldintzatu bazuen ere, azokaren balorazio orokorra positiboa izan da. Izan ere, parte-hartzaileek, oro har, espero baino salmenta gehiago egin zituzten, eguraldi txarrak eragindako zailtasunak gorabehera.

Deialdiak interes handia piztu zuen aldez aurretik, 43 pertsonak eta Eguzkitza BHI ikastetxeak eman baitzuten izena. Azkenean, eguraldiaren ondorioz, izena emandako pertsona batzuk ez ziren azokara bertaratu. Hala ere, Irungo eta Hondarribiko 17 partikularrek beren postuak jarri eta hainbat artikuluri bigarren bizitza bat emateko aukera izan zuten.

Zuzeneko salerosketaz gain, gordailu bidezko salmentarako gune bat ere izan zen azokan. Aukera horri esker, herritarrek salgai jar ditzakete erabiltzen ez dituzten objektuak, postu batean egon beharrik gabe.

78 poltsa berrerabilgarri, ohitura jasangarriak sustatzeko

Denboraldiko azken edizio honetan, Txingudiko Zerbitzuek 78 poltsa berrerabilgarri banatu zituzten parte-hartzaileen eta erosleen artean. Ekimenaren helburua da eguneroko erosketetan poltsa berrerabilgarrien erabilera sustatzea eta erabilera bakarreko poltsek sortzen dituzten hondakinak murrizten laguntzea.

Ekimen horrek bat egiten du Txingudiko Zerbitzuek hondakinen prebentzioaren eta ekonomia zirkularraren alde egiten duten apustuarekin, Merka2dasoa azokaren oinarrian dauden printzipioekin, hain zuzen ere. Merkatuari esker, erabiltzen ez diren objektuek jabe berriak aurki ditzakete, haien bizitza erabilgarria luzatu eta behar baino lehen hondakin bihurtzea saihesteko.

Azken hitzordu honekin, Merka2dasoak amaiera eman dio berrerabilera ardatz izan duen beste denboraldi bati. Txingudiko Zerbitzuek, beraz, kontsumo jasangarriagoaren aldeko alternatibak herritarrengana hurbiltzeko eta baliabideen aprobetxamenduan oinarritutako kultura sustatzeko konpromisoari eusten diote.